Tanah ke d’ambi perintah sigi dibayar

Bala orang empu tanah ke d’ambi perintah kena ngaga projek pemansang, patut ngumbai diri untung laban mayuh orang bukai ke singin minta tanah sida dikemansangka perintah tang bedau bulih, ku Menteri Kedua Langgur Penemu enggau Pengintu Pemisi Dato Sri Awang Tengah Ali Hassan.
Menteri nya mansutka jaku tu lebuh bejadi pengerami nyua chek pampas tanah kena perintah sereta pala tanah ba Dewan Suarah ditu lemai kemari.
Kebuah pia ku iya, atur perintah ti mai projek pemansang ngagai tanah nya, tetap ngasuh rega tanah nya niki kelimpah ari ke meri peluang ngagai sekeda pengawa ekonomi tauka dagang dipejalaika ba kandang menua nya. Iya madah, mayuh orang empu tanah ke nemu pasal tu udah minta perintah datai ngemansangka tanah sida.
“Sigi nadai ajenda belalai perintah ngambi tanah, tang kena ngemansangka sekeda projek ti nguntungka semua, lalu ukai diberi ngagai sebarang sapa, munyi ke bisi dipelaba tauka disebut sekeda mensia mayuh.”
Ka tambah nya mega, tanah ke d’ambi perintah sigi dibayar nitihka rega ba pasar diatu, lalu bepanggai ba undang-undang, lalu ukai sebarang bayar. Iya mega madah orang ke mereti pasal konsep ngambi tanah sigi nemu penguntung rayat dalam pekara tu.
Lebuh meri jamin perintah Barisan Nasional (BN) sigi seruran siru sereta ngerunding pengelantang pendiau rayat dalam semua pemansang iya, Tengah ngelalau rayat ngambika enda arapka cherita putar belit bala mensia ke enda setuju enggau pengawa perintah ke deka nguntungka rayat.
Dalam pengerami nya, Tengah bisi nyua chek pampas penyampau RM234,090 ngagai 42 empu tanah ke dikena bejalaika projek Jalai Tg. Genting/Paradom enggau Tabika KEMAS di Bintangor.
Iya mega lalu nyurung surat pala tanah ungkupka 94 lot ti udah dikemendarka alai numbuhka Program Kampong Tradisonal Sebena di Bintangor enggau TOL ngagai 72 iku orang ke mujur minta lot ba Skim Nangkir Kampung Sarikei ke enda jauh ari Taman Susur Jambu.
Bala sida ke nerima lot tanah dalam Skim Nangkir Kampung dipinta ngena agih skim nya enggau manah, baka enti enda ulih terus nembuka rumah sekali, sida tau ngaga rumah main pupuk, asal meh tembu.
Tengah madah ngagai sida, lot nya enda ulih ditukar nama, reti nya sida anang sekali-kali berunding deka nyual iya.
Lebuh ngenang pasal skim nangkir kampung nya sigi pulaika pemanah rayat, lalu siti ari jalai rayat ulih empu rumah ti menyana, Tengah mega minta saup enggau sukung ari rayat ngambika terus ensepi pengelantang enggau penyamai bisi skim bakanya.
“Enti nyema bisi penyarut rayat ti enda putarka kena bejalaika program nya, perintah nadai chara bukai tang nginsil program nya,” ku Tengah sereta madah program nya siti atur ti deka terus dipejalaika ba endur bukai ti patut dudi ila.
Sama bisi datai ngulu pengerami nya mega Menteri Muda Dagang Temuai enggau Pekara Nembiak Hamden Ahmad, Menteri Muda Bekal Ai Sylvester Entrie Muran, Kaban KN Jemoreng Abu Seman Jahwie enggau Kepala Opis Tanah enggau Sukat Sitak Sarikei Unus Tambi.

Source: The Borneo Post 21st Mar 2007

Isu tanah endang sigi siti isu ka enda nemu ambis dipejurai ka ba menua kitai, lebih-lebih agik ba bangsa kitai Dayak. Arap utai ka ko bala pemesai tuk utai ka amai serta ulih meri penguntung ngagai bala kitai ti bisi ngembuan tanah kelebih agik bala ka ngembuan tanah adat. Tanah adat sigi patut dikemansang ka, tang buah pemansangnya patut ulih meri penguntung ngagai semua, ianya ngagai bala tauka company tingemansang ka tanahnya serta ngagai sidak ka beempu tanah nya. Ukai semina nguntung ari sepiak aja. Arap bala pemesai kitai ulih merati ka utai tuk, alu ulih ngiga serta muka jalai tibetul ngambik semua pihak bulih pemansang serta penguntung